Debant d’a propuesta de Chesús Yuste, PP vota en contra y PSOE, CiU y UPyD s’abstienen
O diputau Chesús Yuste en o Congreso (Foto: CHA)
A Comisión de Cultura d’o congreso espanyol d’os diputaus votó ahiere en contra de que os arcos de l’Alchafería y atro patrimonio d’iste palacio, legalment propiedat d’o Museu Arqueolochico Nacional espanyol, pasasen a estar propiedat d’a Diputación Cheneral d’Aragón. Lo fació debant d’a propuesta presentada por Chesús Yuste, parlamentario de CHA por a colla Izquierda Plural y contó con o refús d’o PP y l’abstención de PSOE, CiU y UPyD. Nomás Izquierda Plural y Compromís refirmoron a moción.
O patrimonio que se’n charraba ye formau por 18 elementos arquitectonicos, estando os más importants dos arcos mixtilineos y un rosetón. Iste patrimonio estió regalau en 1868 por a Comisión Provincial de Monumentos t’o recient naixiu Museu Arqueolochico Nacional d’Espanya. T’a exposición Internacional de Zaragoza y con a enchaquia d’o 25 cabo d’anyo d’a tornada d’os poders t’as Cortes d’Aragón, ixe Museu cedió as piezas ta que se podesen viyer en o suyo puesto d’orichen: l’Alchafería, alcuerdo que se prolargó mientres continasen as obras d’o Museu Arqueolochico, que hue encara continan. Manimenos en marzo d’ista anyada, o ministerio de Cultura s’endrezó t’o gubierno aragonés ta que tornase o debantdito patrimonio, como explicó Yuste en o suyo charrazo.
O diputau d’a Cucha Plural demandó que os arcos pasasen a estar propiedat d’o Gubierno d’Aragón y esfendió os cambios que bi ha habiu en istos zaguers sieglos en os criterios d’os museus y d’a conservación de l’arte en cheneral, de vez que agradeixió a lo Museu Arqueolochico a conservación mietres istos anyos d’os arcos.
Antimás demandó, que se creyase una comisión paritaria Aragón – Espanya d’expertos con l’ochecto de “determinar a existencia de atros elementos de caracter historico artistico en coleccions y museus de titularidat de l’Administración Cheneral de l’Estau” que resultase “consellable de meter en os suyos puestos orichinals en Aragón u en museus aragoneses”. En referencia a los biens d’a Francha, Yuste remeró que “quan charramos de patrimonio cultural aragonés expoliau u exiliau gosamos de mirar-nos enta l’este, pero tamién ye important tornar a uellada enta l’ueste, porque bi ha piezas d’o nuestro patrimonio historico artistico que emigroron en atras envueltas, en iste caso, ta Madrit”.
Dende o PSOE se presentó una esmienda a on que se demandaba a lo ministerio presidiu por Wert que indicase ta qué se quereban istas piezas y qué se iba a fer con ellas en un museu que hue contina en obras. A suya portavoz María Virtudes Monteserín esfendió a conveniencia de que os arcos continasen en l’Alchafería, encara que dició que “si cada ampre temporal de piezas u biens culturals que fa lo Museu Arqueolochico Nacional en diferents territorios esdeviene una excusa ta exichir una donación ta cutio, podemos dentrar en una dinamica de no fer ista practica, lo que fería imposible amostrar y espardir atros biens en atros territorios”.
O PP, en a suya respuesta, remeró lo mal estau de conservación d’os arcos en plegar t’o Museu Arqueolochico y a restauración feita dende ixa institución. Alazetó as suyas razons en a “confitanza entre institucions” y en a salvaguarda d’o patrimonio, fendo referencia a lo naixer d’o Museu Arqueolochico en o bell meyo d’o sieglo XIX, quan muito patrimonio yera en periglo por “os avatars politicos” d’alavez.
A votación dió un resultau en contra de que o patrimonio de l’Alchafería i continase, contando nomás con o refirme de Izquierda Plural y Compromís, o voto en contra de PP, y l’absteción de PSOE, CiU y UPyD.
Comments