CHA leva ta Europa l’ature d’a lei de luengas | Arredol

Tweet

CHA leva ta Europa l’ature d’a lei de luengas | Arredol.

En Estrasburgo reclamarán que o Consello d’Europa reclame protección ta las luengas d’Aragón a lo Gubierno espanyol

23 mayo, 2012 | Cultura | Autor: Arredol |

O venient chueves, 24 de mayo de 2012, CHA compareixerá en Europa ta denunciar o incumplimiento d’a Lei de Luengas de parti d’o Gubierno d’Aragón, y ta alertar sobre a situación de risque de desaparixión en a que se troba l’aragonés. José Luis Soro, president de CHA, explica que “dimpués d’acotolar totas as vías en Aragón, queremos ficar en l’achenda politica d’Europa a dificil situación que confrontan o aragonés y o catalán en Aragón dezaga d’uns Gubiernos, tanto PSOE-PAR y PP-PAR que disprecian o patrimonio lingüistico con o que contamos”.

A vesita ta Estrasburgo incluye dos momentos. En primeras, una comparecencia debant de l’Intergrupo d’o Parlamento Europeyo ta las Minorías Tradicionals, Comunidatz Nacionals y Luengas que ye formato por bells 50 eurodeputaus de diferents nacionalidatz y formacions politicas. Ya de tardis, se ferá una trobada con Alexey Kozhemyakov, Chefe d’o Secretariau d’a Carta Europeya d’as Luengas Rechionals u Minoritarias ta esplicar a denuncia presentata en o Consello d’Europa.

CHA confita en que, dende Europa, se reclame a o Gubierno PP-PAR que reconoixca a realidat lingüistica y treballe ta la suya protección “porque en istos momentos, PP y PAR gosan considerar-las como modalidatz lingüisticas en cuenta de luengas y contradicindo l’Estatuto d’Autonomía” – esplanica Soro.

Soro remera que “Europa tamién debería enfilar-se ta o Gubierno espanyol ta alvertir que a situación d’esprotección que se produce incumple a Carta Europeya d’as Luengas Minoritarias, un decumento europeyo que ha asumiu y que en Aragón se ye incumplindo de forma esclatera”.

Soro remera que en 2009 s’aprebó una Lei de Luengas de minimos que, a diya de hue, encara no s’ha desembolicau y en a que se reconoixeba la pluralidat lingüistica d’Aragón y en a que se declara l’aragonés y o catalán como luengas propias, orichinals y historicas d’Aragón