Origen: O proceso pa fer una grafía común pa l’aragonés continará sin EFA – AraInfo
EFA decidió por mayoría no participar en o proceso. López Susín ha confirmau que atamás d’EFA, o proceso continará con CFA y SLA
A Dirección Cheneral de Politica Lingüistica d’o Gubierno d’Aragón iniciará o proceso pa fer una nueva grafía común y oficial pa l’aragonés sin a participación d’o Estudio de Filolochía Aragonesa (EFA), que ha refusau participar-ie.
EFA decidió o pasau domingo en una votación achustada no participar en iste proceso. Dita asociación considera que “no ye o modo adequau de resolver iste asunto“. En una nota de prensa consideran que “iste proceso blinca u marguina l’actual Lei 3/2013 (…) pues ista estableixe con claridat en o suyo articlo 7 que as competencias en ista materia corresponden a l’Academia“, considerando que ista naixería “sin autoridat“.
Con tot y con ixo, EFA amostra o suyo deseyo de colaboración con a Dirección Cheneral y con as atras asociacions “si ista se replanteya o modo d’abordar iste asunto“.
José Ignacio López Susín, director cheneral, ha afirmau que o proceso no va a aturar-se por a negativa d’o EFA a participar-ie. “Si deciden reconsiderar a suya postura mas ta debant, podrán sumar-se-ie“.
Tanimientres, as atras dos asociacions, Consello d’a Fabla Aragonesa (CFA) y Sociedat de Lingüistica Aragonesa (SLA), han empecipiau a treballar en a propuesta trigando diez lingüistas (especialistas en luengas romances y de talla internacional) d’os que en saldrá tres que ferán un dictamen vinculant que permitirá tener una grafía común y oficial.