Con o refirme d’os concellers de PSOE y CHA s’aprebó una moción en a que se declara a intención de no aplicar a lei de no luengas y demanda a o Gubierno aragonés que no la aplique
Foto: Concello de Broto
O Concello de Broto aprebó con os votos de CHA y PSOE una moción en a quala s’alcuerda amostrar a suya solidaridat enta as y os fablants d’aragonés y catalán, declarar a suya intención de no aplicar a nueva Lei de Luengas y pedir a o Gubierno d’Aragón que no la desembolique, ni aplique “porque incumple a Constitución, o Estatuto d’Autonomía y a Carta Europea d’as luengas minoritarias”.
Pa José Ramón Ceresuela, portavoz de CHA en o Concello de Broto, “l’actual lei de no luengas ye una aberración d’un gubierno acompleixau y antiaragonesista, que ha empentau un disparate filolochico, que fa risa por no clamar por o suyo nombre a l’aragonés y a o catalán, y por ixo en Broto hemos declarau a intención de no aplicar-la”.
“Tristament se sigue sin reconoixer os dreitos d’as y os aragoneses que charran aragonés y catalán, a lei de minimos de 2009 dió visibilidat churidica a las luengas que se charran en o nuestro país, y fació a emersión lingüistica, mientres que l’actual niega a existencia oficial d’as mesmas, minorizando-las, y as relega a l’ambito d’o privau, por a irresponsabilidad d’o PP-PAR que s’han erichiu en verdugos d’o nuestro patrimonio lingüistico”, ha afirmau Ceresuela.
En zagueras o portavoz de CHA ha adhibiu que “respective a l’aragonés, luenga privativa d’Aragón que se charró en quasi tot o nuestro territorio, que pervive en as tres pedretas en Sobrarbe, y d’a quala habríanos d’estar argüellosos, con ista lei corre o serio risque de pasar a estar luenga muerta pa vergüenya de totz os aragoneses”.